政情：辣招拉布 大輝講埋買樓戰績
雖然港府近日已經打晒開口牌，表明要等立法會通過最後一式「辣招」、有關雙倍印花稅（DSD）嘅草案後，先至可以考慮開始「減辣」，但負責審議DSD草案嘅立法會委員會尋日再次開會時，繼續懶理市民要求盡快通過「辣招」嘅呼聲，無所不用其極去「拉布」，最新一招係連買樓戰績都講一餐。
石禮謙爆響口
其實議員變相拉布嘅招數，政府早喺之前審議買家印花稅時領教過，好似當時講豁免雙非嬰買樓都講咗個幾月。
時移勢易到依家審議DSD時，呢班議員再次重施故技，好似民主黨涂謹申同民建聯黃定光，都聯成一線要求政府容許市民首次購買住宅連車位時，車位可獲退還DSD。
至於工業界林大輝更突然申報利益受損，話現有機制就搞到佢入唔到市，主因係自己怕畀市民鬧佢慳嗰少少稅，所以專登分成兩張契做買賣，點知經紀嫌佢煩，索性唔做佢生意。
去到會議尾聲時，地產及建造界議員石禮謙自爆「呢度拉布重要過財委會拉布」，令議員之前發言目的無所遁形！