漁農界立法會議員何俊賢（高佬賢）作風一向唔算高調，講菜講魚就滾瓜爛熟，對於啲政治敏感議題就較少發言。不過，佢早前一連兩次忽然玩高調，透過玩「食字」，揶揄玩轉中西區區議會嘅民主黨區議員許智峰，名字中嘅「峰」字其實係瘋癲個「瘋」，又喺討論流動電視牌照爭議時，話香港電視網絡主席王維基個「基」，其實係電視機嘅「機」，唔單止被泛民鬧爆，連網民都話佢搞爛gag無聊。事出必有因，原來高佬賢嘅反常言行，同佢背後一班激進建制選民有關。
有建制派人士指出，現有各個立法會功能界別入面，數最保守嘅就非漁農界莫屬，佢哋最討厭班成日喺立法會搞搞震，因此對經常明刀明槍、狂插泛民「反中亂港」前漁農界議員黃容根（根叔）非常受落。今屆轉由外表斯文、形象青年專業嘅高佬賢擔大旗後，據悉漁農內部有人嫌佢唔夠激，反映唔到業界選民痛恨泛民嘅「民意」。所以估計高佬賢今次「扮激」玩食字，係諗好晒度過晒先會咁講，唔係忽然爆肚講錯嘢。呢次向選民交咗功課之後，相信高佬賢會回復「正常」、靜番一排咁話喎。