中環出更：美女廚房顯「沁」思
唔少香港女仔都係萬千寵愛在一身，出得廳堂，但未必入得廚房。香港青年聯會賢慧社召集人周沁(Dorothy)早前約埋一班好姊妹大玩「美女廚房」，齊齊裝備自己，學煮意式及法國大餐。
Dorothy號召，賢慧社十多位成員立即一呼百應。佢哋全部係事業女性，平時入廚機會唔多，講到烹調高級西餐，更加係「門外漢」。咁蹺有老友借出廚藝中心，姊妹們即興上番堂家政，搵來大廚傳授秘笈。
炮製意法大餐
大家一睇菜單，就知一啲都唔簡單。一晚要學識整焗薯仔湯、香煎法式鵝肝、海鮮意大利飯、香草煎三文魚、焗黑毛豬柳，仲有法國頂級甜品薑汁梳乎厘，認真考工夫。大廚細心講解烹飪步驟，包括如何處理食材、入廚竅門等，講完一輪，就到時間實習吓。眾人捲起衫袖着上圍裙，拎起鑊鏟炒呀炒，愈煮愈興奮。
平時愛煮幾味嘅Dorothy更大顯身手，親自炮製一杯名為「Dor Dor special」雞尾酒，味道清甜潤喉。秘訣好簡單，就係將一分白酒加十分一紅梅果漿，再加冰搖勻就搞掂。煮得咁辛苦，大家一於拎起酒杯飲番杯，Dorothy捧出一盆出爐梳乎厘，點知唔夠三分鐘，梳乎厘就塌晒，嚇到班姊妹扁晒嘴。大廚解釋話，蛋白分量未控制得好好，嚟緊上多兩堂課就掂晒。
卓妮