航運交通界尋日搞咗場政改諮詢會，除邀請政改相關官員外，仲請埋運輸及房屋局副局長邱誠武（邱副）出席。唔知係咪因為邱副先係負責處理業界問題嘅官員，大家傾傾吓政改，變為談論邱副嘅政績。「的士小巴聯盟」黎銘洪話，唔明白特首點解會繼續搵邱副做副局長，但的士商會嘅黃生似乎有意撐邱副：「副局長都同我哋開過無數次會，係一位盡責盡力嘅人。」黎銘洪似乎唔多認同，就當住邱副面前話：「佢冇見過我哋，係廢柴！」雖然邱副面對業界攻擊，但全程四萬咁嘅笑容，都算係咁喇。
