政改除咗係政治問題，仲係法律問題，香港律師會關注同畀意見當然唔出奇，但係似乎佢哋對會員回應嘅信心就唔多大嘞。點解咁講？有網站話，律師會公共政策委員會日前發電郵問卷，問會員點睇特首普選事宜。該會為吸引會員填問卷，竟然整個大抽獎，獎品係平板電腦及六月全球首映電影《變形金剛4》門票兩張，唔知有幾多律師因為有獎而填問卷呢？
睇番份問卷，佢哋問咗十題，包括對政改諮詢滿唔滿意、提名委員會點樣組成、人數、提名人數同門檻、投票方法、對政改達成共識有冇信心、如果政改失敗用番現行制度滿唔滿意。有律師就話，要佢哋就民主、法治同自由嘅重要性排序，覺得好「幼稚無知」，又批評問卷冇直接問人支唔支持公民提名，只係問提委會人數「無限制」選項，咁樣係咪一早就否定公民提名喎。
不過，中央講到明公民提名唔符合《基本法》，加上公民提名只係泛民主派嘅建議，如果坊間有咩建議都要問過會員，咁份問卷豈不是好長？律師會回應話，該會做諮詢並冇立場，強調諮詢中肯和客觀，至於點解要搞抽獎，該會就冇回應嘞。