政情：馮煒光淪立會箭靶
馮煒光前年被踢爆靜靜雞應徵副局長而退出白鴿黨後，自此已同泛民主派不相往還，依家仲做埋新聞統籌專員（IC），雙方更加冇偈傾，即使佢向建制派埋堆亦不得要領。如果大家仲記得嘅話，去年由佢出任董事總經理嘅公關公司，就因為統籌藝術發展局（藝發局）選舉不力而引起軒然大波。事隔半年，立法會尋日重提呢場換屆選舉，佢依然慘成箭靶，遭建制、泛民圍插，認真悲哀。
樹根促列涉事公司入黑名單
立法會民政事務委員會尋日開會，檢討藝發局去年換屆選舉發現有部分選票釘裝出錯，而已連續四屆承包選舉嘅公關公司話事人馮煒光最終要就選票出錯公開道歉。出席會議嘅建制派議員鍾樹根就把握機會排頭位發炮，以前藝發局成員身份鬧爆公關「有民主黨背景」，○四年至今咁多屆選舉依然錯漏百出，唔專業兼笑大人個口，要求局方將公關公司列入黑名單咁話。體育、演藝、文化及出版界馬逢國亦質疑，局方以咩準則挑選投標嘅公關公司，擺明落馮煒光面。
前白鴿黨友胡志偉 劃清界線
不過，要數言論最絕嘅一定非白鴿黨胡志偉莫屬，胡志偉一開口就澄清昔日黨友馮煒光早喺二○一二年已經退黨，任何出錯都同該黨無關，誓要同馮煒光劃清界線。公民黨陳家洛亦加入踩多兩腳，批評馮煒光當日話要擺平醜聞，但反而令業界質疑選舉結果，建議倒不如由民政事務局自己做番藝發局選舉好過喎。工黨張國柱亦贊成由政府自己搞番場選舉。
民政事務局署理局長許曉暉無奈解釋，話藝發局選舉原本一直由業界自行統籌，局方只係應業界要求幫忙委託代理統籌選舉。其實馮煒光為咗加入政府，出任IC前已將公關公司賣盤畀親戚、撇清關係，但公司仍遭泛民、建制派窮追猛打累街坊，佢自己真係要好好檢討吓喇。