政情：嚴啟泉為內地貧民建屋
有一個安穩嘅居所唔係必然嘅事，非牟利組織中華仁人家園就專幫貧窮人士解決住屋修葺問題。早幾年曾經幫大澳嘅棚屋進行復修保育，近年仲定期北上為冇瓦遮頭嘅偏遠地區居民起屋，下星期就會去廣東及浙江省幫手起樓喇！
曾助修大澳棚屋
仁人家園行政總裁嚴啟泉（Kester）話，本港其實都有唔少日久失修嘅危樓需要翻新，早年佢哋幫大澳棚屋進行維修，改善該區居民住屋情況，目前有九十幾間已經完成修建工程。佢哋亦非常關注內地嘅貧窮住屋問題。Kester曾經喺內地工作，見過內地偏遠地區環境有幾惡劣，用樹皮或紙皮搭建臨時屋嘅屢見不鮮。所以今個月中旬，佢哋會帶一班建屋大使去內地，為村民興建房屋。
Kester表示，投身公益事業後先至真正明白咩係「開心」，仲話發現非牟利組織嘅員工以女性佔大多數，盛讚女仔補牆灰時手工特別靚喎！