天水圍德怡中英文幼稚園因被同區嘅英藝幼稚園暨國際幼稚園，以高價奪去校舍租約而面臨結業，搞到幾百名小朋友要轉校，家長急到冇覺好瞓。教育局局長吳克儉（吳得掂）原本應承今日落區，同立法會議員梁志祥（祥哥）、元朗區議員、德怡教師及家長會面商討善後事宜，點知吳得掂尋日突然話無時間，要改到下星期先見喎！
究竟吳得掂有咩緊要事呢？據聞唔係吳得掂有嘢做，而係佢一啲都唔覺得件事好嚴重。睇唔過眼嘅人爆料話，吳得掂認為事件係商業糾紛，政府不宜介入。祥哥就話，吳得掂同佢講，「英藝已經收咗百幾位德怡嘅學生喇！」立法會議員陳家洛就親耳聽到吳得掂同佢講，「啲家長執到啦！英藝好過德怡咁多，又係名校！」
如果上述傳言屬實嘅話，咁吳得掂就真係好唔得掂。幾百名家長急到喊，佢就話之你，真係佛都有火！