政情：建制派擺明鬥氣
五十七位立法會議員今晚將出發去上海訪問，泛民嘈住要單獨同港澳辦主任王光亞同埋基本法委員會主任李飛會面，尋日終於揭盅，佢哋可以有兩小時慢慢傾。為咗配合呢齣大龍鳳，一眾建制派淪為茄哩啡，條氣自然好唔順。一班大男人就借啲意投訴，騎呢苦水千奇百怪，聽落都幾搞笑。
衣：手提篋點放西裝
據聞立法會秘書處要求鴨仔團盡量帶手提行李，避免去到上海機場後要等寄艙行李，費時失事。有個別建制派男議員就勁不滿，投訴話一個篋仔點裝得晒喎！講真嗰句，雖然兩日一夜的確唔使帶好多衫，之但係一套見得人嘅西裝就點都唔少得，唔係個個男人都好似長毛梁國雄咁「豪邁」嘛！咁佢哋冇理由着住成套老西上機，又唔可以好似梅菜咁求其塞入手提行李箱，唔通要班男人一手攞住件西裝，一手拖住個篋上機咩？
食：貴賓室冇雲吞麵
仲有，聽聞秘書處又要求鴨仔們去到機場之後，一律使用政府貴賓室等待上機。擁有一張某航空公司白金卡，可以免費享用該航空公司貴賓室嘅黃定光（象哥）就勁呻話，政府貴賓室入面只有餅乾，無乜嘢食，唔似嗰間航空公司貴賓室有免費零食同埋雲吞麵，食到飽飽再上機都未遲，一諗起覺得唔開心喎！見佢咁大個男人咁為食，講到扁晒嘴，真係搞笑。
行：無會開時悶得滯
咁仲未夠，有人就連泛民單獨與京官會面兩小時，令佢哋嗰唔知點打發嗰兩個鐘都投訴餐飽。事關佢哋星期日回程當日午後先至同兩位京官會面，根據劇本，建制派早喺兩點半已經要自動消失。但係秘書處就安排議員當日五點半坐車離開酒店去機場，當泛民同中央官員會面嗰陣，佢哋都唔知可以去邊度打發時間，得嗰兩小時，想去得遠啲又唔得，唔通同在場守候嘅傳媒一齊吹水咩？不過個別有米議員就冇咁好氣，寧願畀多啲錢改機票提早返香港，費事留喺上海虛度光陰。