中環出更：患病休養三年 劉吳惠蘭復出
三年前因健康理由辭職嘅商務及經濟發展局前局長劉吳惠蘭（Rita）久休後復出，下個月起將出任公務員敍用委員會主席，接替現任主席吳榮奎之位。卓妮第一時間致電Rita，唔知佢嘅身體狀況可否勝任？佢就話幾好，醫生都話出任呢個職位無問題喎！
港府尋日公布，Rita將於下個月起上任，任期為三年直至一七年四月底。公務員事務局局長鄧國威話，Rita係一位資深公務員，對公務員體系有豐富嘅認識同經驗，加上佢有行政同管理才能，一定能夠勝任呢個位置咁話。
掌公務員敍用委會
Rita於一一年因身患頑疾而辭職，當時震驚政界，有傳佢係患腸癌。所以今次久休復出，大家最關注嘅都係佢身體能否負荷。Rita就話無問題，仲話感謝政府嘅信任，又好感恩喎。其實敍用委員會主席個位出晒名歎，主要職務係就公務員嘅聘用、晉升同紀律事宜向特首提供意見，一啲都唔困身，對身經百戰嘅Rita嚟講，易過借火喇！
卓妮