中環出更：嚴子杰「泰」上癮 拜師拳王
做運動怕悶，係好多人嘅心聲。仁濟醫院前主席嚴玉麟嘅大仔嚴子杰（Jacky）正因為咁而愛上泰拳。大約半年前，佢重遇贏得兩屆冠軍嘅香港輕量級拳王郭家文（Kaman），於是搵Kaman做星級私人教練。雖然練拳一啲都唔輕鬆，但Jacky愈打愈興起，打算遲啲帶埋太太嚴韓應心（Jeanly）去拳館做瑜伽，實行拍拖做運動。
Jacky話，幾年前佢曾經同朋友一齊玩過泰拳，後來因工作忙碌而停止，當時佢同Kaman已有一面之緣。半年前佢重遇Kaman，知道Kaman同朋友喺鰂魚涌開設一間六千呎拳館，所以就搵佢做師傅，重拾練拳樂趣。Jacky好鍾意運動，閒時會約朋友踢波、打籃球，不過佢認為泰拳勝在冇咁悶，又可以學得搏擊技術自衞，一舉兩得。
講起拳王，咪以為一定係大隻佬，Kaman就好斯文。佢笑笑口話，好多人都唔信佢玩泰拳，可能外界對泰拳有誤解，以為好暴力，其實泰拳都係正當運動，仲可以減壓。講起入行故事，都係誤打誤撞。Kaman話，十年前佢做救生員，有次健身教練介紹佢接觸泰拳，點知就咁打出興趣，兩年後更一舉奪下香港輕量級拳王。Kaman話，開設拳館目的係培養人才出賽，亦方便自己日日練拳，隨時備戰。
帶老婆去做瑜伽
Jacky都話，太太Jeanly初時都唔放心畀佢學泰拳，怕出入嘅人品流複雜。後來太太同佢一齊到拳館幾次之後就放晒心。佢聽聞Kaman嘅拳館遲啲打算開埋瑜伽課程，心思思帶埋Jeanly一齊去，咁就可以一齊拍拖做運動喇！
卓妮