港島東區南豐選區因白鴿黨區議員梁淑楨嚴重中風，出現議席空缺，需於下月舉行補選。繼民建聯（民記）同白鴿黨派員報名參選之後，人民力量本來都打算喺呢區爭一席位，不過佢哋尋日開會決定放棄競逐議席，聲稱因為要集中宣傳公民提名及「佔領中環」行動，而且梁淑楨因中風而落台，咁樣搶人哋個位不合道義喎！咦？一向以狙擊為樂嘅人力，又會突然變得咁有慈悲心嘅？
八卦友話畀我哋知，實情係因為人選方面出現問題。有傳人選之一係人力主席袁彌明，但係佢啱啱先出戰南區海怡補選失利，冇理由早兩星期先心繫海怡，轉個頭就心繫南豐o架。至於另一人選係該黨前主席劉嘉鴻（劉嗡），但黨內評估劉嗡冇乜號召力，擔心最後會輸得唔好睇，所以焗住放棄今次機會囉！南豐選區補選將於本周四截止提名，並於下月十八日進行投票，預料到時好大機會係場單對單嘅選戰，由東區區議會主席黃建彬嘅助理李清霞大戰梁淑楨嘅助理張國昌。