外交部駐港特派員公署發言人前日啱啱批評完美國干預香港政改，但外號「李漢奸」嘅民主黨創黨主席李柱銘同外號「民主阿婆」嘅前政務司司長陳方安生一於懶理，去完美國唱衰香港之後，尋日又喺加拿大搞論壇，向當地華僑繼續數臭內地同香港。兩人嘅反中亂港言行，連同屬泛民主派嘅公民黨黨魁梁家傑都疑似睇唔過眼，尋日同傳媒茶敍嗰陣就向兩人大潑冷水。
梁家傑指出，任何國家嘅外交政策，都係由佢哋嘅自身利益主導，如果想靠美國幫助香港人爭取民主，直頭係妄想同不切實際，強調香港人想爭取民主一定要靠自己。
此外，喺尋晚舉行嘅體育文化界政改論壇上，有與會者不點名指有「一男一女」嘅「民族敗類」，走咗去美國乞求美國佬干預香港政改，要求港府透過輿論作出反擊。與會嘅政府官員回應指，香港政制發展係中央同特區之間嘅事，特首普選亦係由《基本法》賦予，相信香港人有足夠智慧處理，毋須外國政府介入，呼籲大家尊重現實，變相再次暗批李漢奸同民主阿婆發緊夢。