政情：機管局權鬥 羅康瑞敗走
現任機場管理局（機管局）主席張建東明年五月任期屆滿，外界早前盛傳瑞安集團主席羅康瑞係大熱人選。然而時移勢易，羅康瑞早前因機場北土地用途爆爭拗憤而辭去機管局基建規劃委員會主席。撈唔掂搞到一鑊粥，羅康瑞最終敗走機管局。據悉最近當局正式敲定由即將卸任貿易發展局（貿發局）主席嘅蘇澤光（Jack So）接任機管局主席一職，至於羅康瑞就會空降到貿發局做主席，但聽聞貿發局內部已現反彈，分分鐘掀起一場人事大地震。
蘇澤光接任「機頭」
今明兩年會有多個重要公職嘅主席職位要換人，據聞當局經過周詳考慮後，新一輪音樂椅即將轉動。其中Jack So內定為機管局主席，接替張建東之位，羅康瑞就好大機會做貿發局主席。消息指，當局睇中Jack So做機管局主席，一來佢係政務官出身，擁有豐富嘅商界同管理大型機構經驗，有足夠政治手腕去帶領機管局迎接未來多個挑戰，包括因興建機場第三條跑道，或引發同環保團體新一輪角力。
至於羅康瑞由機管局大熱人選變成落荒而逃，消息指底因係羅康瑞同機管局管理層不咬弦，早前由於佢喺機場北土地用途問題上獨排眾議，與機管局董事局爆發爭拗，令內部不和公開化，因此有關方面決定剔除羅康瑞於考慮名單之列。
貿發局主席多人爭
最新消息話，羅康瑞嘅下一站係貿發局主席。不過話雖如此，羅康瑞嘅未來走勢仍充滿變數，也不一定會順風順水，事關貿發局主席一職向來工商界中人都爭崩頭想做，有傳多名工商界人士都對呢個位虎視眈眈。再者，羅康瑞較難同人合作，聽聞貿發局咁啱有高層即將約滿離職，羅康瑞喺局中嘅評價一般，分分鐘觸發新一輪逃亡潮。所以一句到尾，羅康瑞咪以為跌咗個橙執返個桔，稍一不慎，又踏入一個泥潭就真。