中環出更：區詠芷膺「慳水女王」
環境局局長黃錦星出晒名超級慳電，平均每日只用一點五度電，連天文台前台長林超英都甘拜下風。原來環境局政治助理區詠芷（Michelle）都好慳家，尋日佢自爆兩年都未交過水費，連水費單都無收過。
自爆兩年唔使交水費
去年Michelle獲委任政助，佢驚漏交水費招人話柄，於是上任前打電話去水務署追問，先知兩年嚟累積水費都唔過十蚊，所以連水費單都冇喎！
大家實同卓妮一樣，好想知Michelle究竟點過日子？佢係咪唔煮飯、唔喺屋企沖涼先？Michelle就話，佢每晚都會煮飯，屋企一早裝咗慳水水龍頭，仲有每次用水最少要用三輪先會倒，好似洗米水會留番嚟洗菜，再用嚟洗碗。佢話最緊要都係用水習慣，例如刷牙時唔好水長開，每次開水龍頭都會較細個出水位。
Michelle仲教路話，抽濕機都係慳水妙方，遇着近期天氣咁潮濕，一晚已經抽到成廿、卅公升水！Michelle話，只要勤洗隔塵網，抽濕機啲水都可以用嚟飲，但係佢過唔到心理關口，所以只會用嚟洗碗同淋花。
估唔到Michelle仲識得將抽濕機變成製水機，封佢做「慳水女王」也不為過喇！
卓妮