中環出更：終身學習名人升呢
香港管理專業協會（HKMA）早前舉辦周年晚會，城中大老闆都去撐場，包括身兼協會主席嘅中港照相器材集團主席孫大倫（Dennis）、「電鑽大王」香港工業總會前主席鍾志平（Roy）及大家樂集團主席陳裕光等人。做人最緊要終身學習，Dennis同阿Roy雖然已退居幕後，但都不忘學新嘢，Dennis學緊整電子相簿，阿Roy就鑽研宗教與歷史書，確保唔同時代脫節。
鍾意影相嘅Dennis近期迷上自製電子相簿，得閒就將珍藏相集左砌右砌。但講到開相展，Dennis就話怕醜，唔會開嘞。除咗影相，佢又興起鑽研養生食療，話每餐進食四成肉類蛋白、三成蔬菜、一成粉麵類，再加一隻雞蛋及少量海鮮，保證營養夠晒均衡，健康又唔肥喎！
鍾志平研歷史 盼鑑古知今
出晒名鍾意讀書嘅阿Roy都唔執輸，雖然佢已擁有四個博士學位，不過最近又迷上研究宗教與歷史，可以話係終身學習嘅最佳代言人。但係點解會揀宗教及歷史書呢？阿Roy就話，鑑古知今，無論係提升管理質素，或者對做人處世嘅裨益都好大。
講起管理心得，Dennis話最忌急進，要畀員工適應期，好似佢廿年前曾經引入外國優質管理概念，思想夠晒前衞，但員工卻不太受落。直至幾年前再大力推行，終於水到渠成。所以話，改革要循序漸進，做老闆亦要不斷升級。
叙福樓集團執董黃傑龍亦有到場，佢推崇企業要有人情味，去年十月集團發起派代用飯，各界迴響熱烈，今年四月中起，善心人士只要上網就可以畀錢捐出代用飯，齊為有需要人士送暖。
卓妮