生意淡薄 棄起貨倉
呢兩幅地皮自田二少前年上任以來一直報稱持有，對於突然放售，田二少向我哋解畫，話原本兩塊地想用來做貨倉，可惜旗下時裝品牌搶攻馬來西亞市場多年，除咗首都吉隆坡生意比較旺之外，其餘檳城、怡保嘅生意都相當麻麻。有感品牌喺當地不足以建立全國性連鎖企業，又唔值得為吉隆坡市場建貨倉，所以最近索性賣咗兩幅地。
雖則話田二少因生意黯淡而賣地，但兩幅地最後居然帶挈田二少「因蝕得賺」。佢透露，地皮買落至少十幾年，平均每年升值逾一成，咁計法田二少賣地嗰刻最少有一倍斬獲喎。佢笑言價錢「OK啦」，但就強調當初買地完全為咗自用，冇諗住投機o架！