政情：陳智思囝囝 寸老竇「得把口」
可持續發展委員會主席陳智思（Bernard）曾經幫政府做過唔少諮詢工作，好似發水樓、碳排放，去年仲幫環境局局長黃錦星接手做垃圾徵費呢個燙手山芋，所以呢期頻頻喺公開場合力銷垃圾徵費，唔單止被市民喪鬧，仲被傳媒封佢做黃錦星嘅「奶爸」。不過，Bernard話呢啲都唔算苦差，最大壓力反而係來自佢啱啱升中學嘅大仔Brandon。
屋企垃圾分類做唔足
身兼行政會議成員嘅「公職王」Bernard向卓妮訴苦，話每次去完公開活動講垃圾徵費，返到屋企都例牌被大仔寸佢，話佢喺鏡頭面前叫市民要做好垃圾分類，但自己又唔做。Bernard大叫冤枉話，屋企有做源頭分類，只係初期唔可能做得晒咁多種垃圾，如果唔係做呢份諮詢，都唔知道原來回收都有咁多種類，淨係一個廢膠樽都有三種唔同嘅塑膠物料組成。
Bernard話，依家清楚晒香港嘅垃圾管理同流程，仲知道台北市要做七種分類咁多。佢建議政府唔好搞到咁複雜，收費初期最緊要話畀市民聽，政府會點樣收錢、垃圾丟去邊、點樣分類。