泛民主派絕食爭普選行動尋日踏入第八日，當初氣勢如虹嘅十七人絕食團，截至尋日已走剩四個，當中包括白鴿黨胡志偉，佢哋所屬政黨尋日仲無端白事「放氣」球，唔通想寄語絕食人士及早放棄？原來佢話一百九十二個氣球，寓意四人絕食一百九十二小時，將真普選訴求傳遍香港喎。訴求係咪傳遍香港就唔知嘞，淨係知道氣球嘅塑膠污染咗香港環境。
絕食團苦撐至今近二百小時，可惜傳媒曝光率低、市民迴響亦唔大，可會覺得絕食行動「嘥氣」？佢哋就死撐行動「非常成功」，仲透露正籌備下月發起第二波絕食，會另覓人選重新組團絕食咁話。
雖然佢哋口講就非常成功，但觀乎放氣球現場，搵極都唔見有泛民重要嘅盟友、公民黨嘅身影，汽球顏色更係橙、綠分明，兩色分別代表工黨同白鴿黨，泛民所謂的「團結爭普選」恐怕只係大隻「講」居多。