政情：普選方案有你冇我 泛民鬼打鬼
佔領中環行動將會喺下個月六號舉行第三次商討日，千幾名簽咗意向書嘅參加者可以喺政黨或政團提出嘅政改方案中揀出最後三個，再交由全港市民用電子全民公投方式選出終極方案。不過，由於大家提出嘅方案差唔多，學民思潮及專上學生聯會（學聯）打算考慮整合各方案內容，加上十八名學者提出嘅「公民推薦」方案，實行同真普選聯盟嘅「三軌方案」鬼打鬼爭出線，睇嚟泛民愈搞愈分化，一盆散沙。
雖然民間團體各有唔同主張，但由於學民思潮、保衛香港自由聯盟（保自聯）及學聯倡議嘅方案中，同樣有公民提名成分，於是順理成章將三者拉埋一齊。據聞由於三個團體對提名門檻及提名委員會嘅功能有唔同嘅理解，例如學民思潮認為要有十萬選民提名先可以成為特首候選人，但學聯就覺得只要有百分之二選民支持就可以，所以佢哋將會喺兩個星期內開會討論統一方案安排，讓市民容易理解。
鄭宇碩：唔符合原則
雖然學民思潮諗住合併部分方案，但民陣就無打算同佢哋合作，只係擔當推銷角色，等齊泛民提交方案後，就會同其他民間團體開會，討論應該向市民推薦邊啲方案，之後更加會落區開街站派單張，集中火力宣傳選定嘅方案。
泛民政團呢邊玩「眾裏尋他」，真普聯就繼續擁抱包括公民提名嘅「三軌方案」，召集人鄭宇碩尋日仲喺電台節目同其他方案倡議者鬧口水交。鄭宇碩話，雖然十八名學者提出嘅「公民推薦」方案有公民推薦成分，但由於具參選資格嘅人士有機會不獲提名委員會接納成為候選人，唔多符合公民提名原則喎。
方志恒：唔存在讓步
不過，有份聯署學者「公民推薦」方案嘅教育學院亞洲及政策研究學系助理教授方志恒認為，方案唔存在讓步，話一班學者只係希望喺《基本法》框架內，提出得到最多人接受嘅方案。「公民推薦」方案建議只要任何人取得約七萬名合資格選民推薦，再可以交由提名委員會八分之一提名就可「入閘」，幫港出聲發起人何濼生就質疑，有關方案變相向提名委員會施壓。