中環出更：立會救命掣失靈 關長毛事？
銀行或的士司機為咗預防賊人打劫，通常都會裝咗個緊急救命掣，一就可以報警。唔講唔知，原來立法會議員辦公室都有類似嘅救命掣，但唔係接駁去警署，而係通知立法會保安控制室。辦公室喺十樓嘅勞工界議員鄧家彪透露，半個月前有立法會職員做例行檢查時，發現佢所屬樓層嘅救命掣失靈，笑言唔知係咪因為早前自動消防灑水系統啟動而整壞啲掣呢？
只係「線路問題」
相信大家應該記得消防灑水呢件事，其實就係去年五月，社民連議員「長毛」梁國雄十樓辦公室嘅灑水系統啟動咗，估計係有人食煙，依家殃及池魚搞到同層嘅救命掣都失靈。有議員話好擔心，盡量唔會喺辦公室接見太激動嘅求助人，唔係到時有事就愛莫能助。
秘書處就話，上月中檢查時發現有九個同層嘅救命掣因為「線路問題」操作唔到，已經安排機電工程署維修。其實食煙已經係十個月前嘅事，話救命掣失靈同呢件事有關似乎有啲牽強喎。
卓妮