中環出更：東華總理春祭 義莊「唔陰森」
清明節除咗係市民拜祭及掃墓外，東華三院董事局成員亦按習俗拉大隊到旗下祠廟參觀及拜祭，地點包括廣福祠、文武廟、東華義莊及靈灰安置場。負責帶隊嘅新一屆主席施榮恒話，每年董事局都有幾次巡視院屬活動，而清明節春祭就係第一波。唔少新任總理都係第一次參觀東華義莊，發現原來並非電影場景咁陰森。
位於大口環道九號嘅東華義莊原址位於西環牛房義山，全盛時期寄存靈柩數目超過六百具、骨殖八千副，有電影亦曾於該處取景。唔知係咪受電影影響，好多人都以為東華義莊陰森恐怖，但其實只係電影拍攝效果。副主席王賢誌話，做咗幾年總理，已經來過義莊幾次，可能舊址因為破舊而略顯陰沉，但新址經過修葺後簡潔莊嚴，加上清明時節前往祭祀嘅人好多，人氣較旺，並唔係大家想像中咁得人驚。
廖偉麟文武廟摸關刀
第一副主席何超蕸因為家族關係，外表予人西化嘅印象，但原來佢自細每逢春秋二祭都會跟足傳統，同家人一齊去拜祭祖先。所以佢加入東華三院之後，好快就已經融入呢種東方文化同傳統，而且仲非常熟悉添！
至於剛成為新總理嘅廖偉麟，原來係由阿叔廖創興企業主席廖烈武介紹加入東華三院，阿叔話做總理可以學到好多嘢，而佢今次去參觀義莊就已經體驗到喇。今次參觀沿途有職員講解，令佢對東華三院及香港歷史發展都有更深嘅認識，獲益良多。做開投資嘅廖偉麟，去到文武廟時仲不忘按傳統撫摸壇前大關刀，寓意「過五關斬六將」，希望生意順利。
卓妮