政制及內地事務局局長譚志源（Raymond）一向都口甜舌滑，尋日出席九龍東區各界聯會舉辦嘅《基本法》研討會時，就向與會者講解《基本法》點樣同商界息息相關，話兩者關係就好似「人同空氣、魚同水咁，喺生活入面唔覺得佢嘅存在，但如果冇咗佢就生存唔到！」嘩，呢句說話係咪肉麻呢？不過，唔單止咁，Raymond喺開場時，仲話二十四年前嘅四月四日，就係正式頒布《基本法》嘅日子，所以出席相關研討會，就好似出席緊生日會咁話。講到咁樣，似乎over咗囉！
