政情：方剛「偷步」訪滬為湊孫
立法會議員應中央邀請，下周五（十一日）晚赴上海三日兩夜傾政改。由於抵達上海當晚並冇安排任何節目，部分建制派議員寧願唔跟大隊，改為翌日先出發，免得浪費時間喺上海過夜。不過，祖籍上海嘅批發及零售業界議員方剛諗都唔使諗，就表明一定會去，仲特別提早當日下晝就起飛。原來方剛只係湊孫心切咋！
兩孫居上海「順路」
「方」齡七十嘅方剛經已有三粒乖孫，其中兩個內孫定居上海，所以當佢獲悉立法會有意組團赴上海，就即刻應承，仲安排早幾個鐘出發，就係為咗抽時間探乖孫。不過，方剛唔會離開大隊返自己屋企住，話始終傾政改要緊，湊孫只係順路啫！
提起孫仔，方剛仲透露內孫鍾情消防車，所以早前就趁孫仔來港，特登帶佢去尖沙咀消防局開放日「朝聖」。在場嘅油尖旺區議會主席鍾港武，見到方剛光臨，想話安排佢坐貴賓席。不過抱住個孫嘅方剛一於少理，表明以普通身份參觀，謝絕貴賓式招待，真係廿四孝爺爺。