政情：吳得掂轉任「旅遊專員」？
教育局局長吳克儉（吳得掂）被「燉冬菇」轉任「旅遊事務專員」？教育局近日向立法會財務委員會提交嘅文件顯示，吳得掂自前年十月上任以來，截至上月已經以局長名義外訪十三次，耗費公帑二百六十二萬元。上任短短一年半，無論外訪開支、次數都已經遠超上手孫明揚任內五年嘅總和！唔單止咁，有消息話吳得掂連辦學團體嘅交流團都唔放過，一於有機會「遊埠」就唔好嘥！
吳得掂早已有外號叫「外訪局長」，絕對唔係浪得虛名。據悉吳得掂前年甫上任，即要求下屬製造多啲外訪機會，最好「每月一外訪」添！而七除八扣所有年假、補假及公眾假期後，吳得掂十八個月外訪十三次，咁多次加埋嘅離港日數超過一個月，應該達標有餘。吳得掂尋日出席財委會特別會議回應指控時，就死撐外訪有一定作用同價值，好似同業界赴海外就幼稚園教育吸取經驗，同吸引國際專家來港交流喎。
學生印尼考察 夾硬跟去
不過，外訪都話公幹啫，但吳得掂不但逢請必飛，有時候仲夾硬要飛。據知情人士爆料，話吳得掂早前一聽到有辦學團體率領學生飛赴印尼考察交流，原本只係一個學生研習分享會，點知消息傳開畀吳得掂知道咗，佢二話不說即刻要求去埋一份，難為該辦學團體焗住「邀請」局長出席。根據教育局嘅文件顯示，吳得掂的確曾經訪問過印尼，但係咪參加辦學團體嘅訪問團，咁就冇寫得咁清楚嘞，而有關外訪開支亦唔知係邊個找數。
涉濫用公帑 影衰個名
開講有話「克勤克儉」，但吳得掂似乎「名」不副實，上任以來不但搞邊瓣衰邊瓣，好似國民教育風波、林慧思爆粗辱警事件，就連雙非學童搶幼稚園學位都搞到一鑊粥，依家再接連被踢爆涉嫌濫用公帑「遊埠」，難怪被謔稱為最唔夠班局長之餘，仲經常傳出同下屬不咬弦。奉勸吳得掂做隻有腳嘅雀仔，飛夠就好落地行，唔係連旅遊事務專員都冇得你做呀！