中環出更：「絕食爭普選」 得番四個人
泛民主派「絕食爭普選」行動踏入第八日，絕食嘅十七人當中只剩下四人，而白鴿黨總幹事林卓廷（阿廷）絕食咗一百七十三小時後，尋晚終於頂唔順宣布停止絕食。
阿廷「身材論」疑暗寸黨友
期間阿廷就提到，身材高挑嘅人，體力消耗量較大，唔可以長時間唔食嘢，佢頂到咁耐都算係咁，相反身形矮細嘅人就可以絕食得耐啲。於是有人就質疑，點解該黨身形偏矮嘅「AV仁」何俊仁同李永達咁快就要停止絕食呢？莫非佢兩個身體虧得咁緊要？
話說前晚有護士幫阿廷做例行身體檢查時，話由於佢一飲葡萄糖水就會肚瀉，代表身體已經開始頂唔順。加上佢離家絕食八日，太太就擔心足八日，搞到佢非常歉疚，於是決定停止絕食，返屋企見吓啲屋企人。至於繼續絕食嘅立法會議員胡志偉就話，幾日唔食嘢都唔覺得太辛苦，雖然絕食者唔可以做劇烈運動，但佢外母落柯打要佢一齊去拜山，所以佢今日會先乖乖地去拜山，之後再返滙豐總行外繼續絕食喎。
卓妮