中環出更：中日瀕開戰 蔡伯勵：冇事o既！
順德聯誼總會早前舉行六十七周年會慶暨新一屆會董就職典禮，一眾順德名人鄉親聚首一堂，包括卸任主席湯偉立、新主席李塔源、副主席兼永隆銀行後人伍步功等人，堪輿及曆學大師蔡伯勵都有到場。有術士批算今年地緣政治躁動不安，中日可能再掀起甲午戰爭，蔡伯勵就畀大家食定心丸，話只要中日互相退讓一步，冇事嘅！
保良局前主席梁寶珠一早就到場，佢自稱係典型順德婦女咁入得廚房。細數拿手好菜，首推功夫菜蒸魚腸，佢話好多人怕魚腸污糟，所以佢只取用魚腸衣及魚膶，十幾條魚腸只能炮製成一小碟，好多朋友食咗勁讚似鵝肝醬喎！
李塔源嘅囡囡、仁濟醫院總理陳李詠詩（Jenny）亦現身捧場，Jenny最近出任香港校董學會副會長，所以特別關注十五年免費教育問題。佢話現時幼兒教育課程參差，有人話五歲唔可以寫字，有人就話三歲要背三字經，家長無所適從。佢安排大女及次女入讀課程嚴謹嘅幼稚園，三女及細仔就入讀啟發性幼稚園，結果兩名家姐讀書真係好叻，三女功課追得好辛苦，但待人接物及主動性好，好得人鍾意。佢認為好難斷言好與壞，但政府應將幼稚園列入正規教育體系統一管理。
李塔源接掌順德總會
當晚到場嘅仲有順德新抱前立法會議員梁劉柔芬、羅氏針織後人羅嘉穗及南區區議員廖漢輝等。李塔源話，總會係慈善團體亦係辦學團體，旗下有十幾間中小學及幼稚園，除咗推動教育事業，亦積極參與扶貧救災，佢接掌順德聯誼總會後將繼續發揚光大，為社會送暖。
卓妮