政情：八網難逃：李文斌「又中獎」「愚」樂好友

理文造紙行政總裁李文斌（Edmond）同太太何芷韻（Amanda）出晒名恩愛，三年前生咗一對龍鳳胎，去年七月又意外添丁。前日四月一日，Edmond喺社交網絡上載一張驗孕棒嘅相，標題係「又中獎？」支驗孕棒有兩條紅線，即係有喜咁解，六十幾個朋友即刻讚好，爭住恭喜佢。點知原來係愚人節嘅玩笑啫！

今次受騙嘅好友包括南旋集團執行董事樓家強、港協暨奧委會義務秘書長彭沖千金彭芷君，仲有朋友讚佢哋好「productive」，即係多產。後來有心水清朋友篤爆話，早已喺社交網站見過張相喇！Edmond先至祝大家愚人節快樂。