人稱「李漢奸」嘅民主黨創黨主席李柱銘同「民主阿婆」前政務司司長陳方安生，尋日繼續美加「唱衰香港」之旅，仲雙雙接受外國通訊社訪問，認真合拍。
不過李漢奸就喺訪問中有意無意咁，自爆今次訪美疑似遭到美方冷待，令人覺得美國重視同中國嘅關係多於關注香港情況。其實古今中外，做漢奸嘅下場幾乎都係用完即棄，冇晒利用價值時就畀人唾棄。李漢奸同民主阿婆今次罕有「行孖咇」出訪都搞成咁，再次證明佢哋呢兩粒舊電池，早已畀美國佬用到乾晒塘！
李漢奸喺訪問尾段透露，佢哋由紐約轉飛美國首都華盛頓後，將會獲美國民主共和兩黨嘅國會議員接見，但係規格待遇就無以前咁好。不過佢並唔承認自己係遭到冷待，只係「唔好彩」啫，又自言以前佢每次訪美，都會有人同佢講話選擇錯咗訪問時間，因為咁啱都有好多與中國有關嘅國際性議題擺咗上枱，包括之前嘅伊朗同北韓問題，以至今次撞正嘅克里米亞同烏克蘭問題喎。查實伊朗、北韓同克里米亞三地嘅問題，與美國佬關唔關注香港政改又有乜關係呢？李漢奸真係好有阿Q精神囉！