白鴿黨立法會議員黃碧雲（一舊雲）早前出席政改早餐會後，大爆有與會者喺會上講《基本法》第二十三條立法，話冇廿三條就冇普選，但結果被指引述有誤。不過，原來佢早已有前科，唔只出名係舊雲，仲出晒名口疏。據聞佢擔任監警會委員期間，喺探討處理辱警新指引時，就被指漠視監警會同警方代表之間嘅保密協議，於公開會議期間，霸個實有傳媒影到嘅位置嚟坐，仲大爆閉門會議討論內容，搞到神憎鬼厭。啲委員私下約食飯，都指明唔預呢舊雲咁話。
據聞除咗監警會委員孤立一舊雲外，連佢啲黨友都話，唔可以畀佢隨立會去上海與北京領導會面傾政改，因為擔心佢會後又再懶醒引述京官說話，到頭來引述錯誤，添煩添亂喎！所以白鴿黨中人估計，如果該黨最後決定派半數人，即黨內三名議員去上海，都冇一舊雲份。其實咁大個人應該識得衡量得失，倘若冇咩記性，不如乜都唔講，做番與世無爭嘅一舊雲，好過獻醜吖！