政情：自打嘴巴財爺信唔過
自從新一份財政預算案揭盅之後，財政司司長曾俊華（鬍鬚曾）成日恐嚇話，香港最快七年後出現結構性財赤，搞到唔少人聽到「結構性財赤」就騰騰震。鬍鬚曾尋日出席香港專業聯盟午餐演講時，被問有咩好計增加政府收入時，佢竟然自認「冇招」。幾年前佢仲成日話要擴闊稅基，尋日就話加稅分分鐘因加得減。難為佢講得出呢啲自打嘴巴嘅說話，呢位「破產」財爺真係白逗人工。
「七年後財赤論」賴學者
鬍鬚曾尋日出席午餐演講，一上台先認錯，話傳媒對佢預算案有三大質疑，當中最致命嘅要數佢「年年估錯數」。仲話有人話佢預測未來一年財政狀況都唔準，點信佢二、三十年後嘅預測呢？咦！鬍鬚曾果然認真聽民意喎，知道市民有幾憎佢，不過佢話對呢啲指控「無言以對」喎！
當大家以為佢轉死性認低威，殊不知話口未完，佢即刻將責任推到一乾二淨，話「七年後財赤」嘅恐怖預言係長遠財政計劃工作小組研究所得，唔關佢事。仲話小組嘅預測同佢做開嘅按年預測唔同，皆因香港每年財政狀況都受外圍經濟影響，不確定性較高，長遠財政趨勢就唔同。咁講法，即係要小組一班學者及會計師專家硬食死貓啫！
鬍鬚曾又話，唔少人批評工作小組報告高估開支、低估收入，冇考慮多項動態因素，又話政府近年推出多項民生措施同基建，相關開支嘅增長會放緩，不滿佢經常借用目前數據「篤數」，誇大日後開支增長。鬍鬚曾逐一反駁，強調小組推算已反映有關動態因素，仲話正正因為政府做咗咁多基建，證明政府冇刻意低估收入、限制開支增長，總之就一味呻窮靠嚇，繼續散播恐慌情緒喇！
終認「冇招」增政府收入
聽完鬍鬚曾一輪嘴自嘲加辯駁，好彩台下嘅專業人士頭腦仲好清醒，專業聯盟副主席區嘯翔就問佢有咩好計增加政府收入，鬍鬚曾終於自認「冇招」，話開徵新稅從來都唔受歡迎，好似早幾年提出嘅商品及服務稅，亦因為反對聲音大而擱置。最叻「篤數」呃神騙鬼嘅鬍鬚曾，今次連自己都打倒昨日的我，仲有咩信譽可言呢？