中環出更：「峰」鴿又博出位公然違規
民主黨（白鴿黨）區議員許智峰早前兩度玩轉中西區區議會轄下嘅小組會議，表面上就係質疑建制派借推廣《基本法》撥款利益輸送，實際上就似係無所不用其極博出位。尋日佢仲殺入立法會大樓繼續搞搞震，並公然違規喺官員同議員專用嘅「咪兜」位接受傳媒訪問添。
許智峰喺首次中西區區會小組會上畀警員抬走，對底誰是誰非，有待法律專家定奪，但佢同佢班黨友之後嘅一連串滋擾搞事行為，就大家都自有公論。許智峰其後聲言會喺區議會無限期靜坐，但靜坐咗兩日見無乜人理，尋日就喺白鴿黨立法會議員單仲偕陪同下，入咗立會大樓狙擊民政事務局局長曾德成。原因好簡單，因為立法會有多啲記者嘛！
擅自用立會「咪兜」受訪
許智峰最初揚言會好似啲台灣學生同立委咁，「攔截」準備入內開會嘅德成局長，但可能佢其後知悉咁做會違反《特權法》觸犯刑事罪，最後只係好有禮貌咁遞信。德成局長就贈咗佢兩句，強調香港係法治嘅地方，如果撥款過程有利益輸送，自然會受到法律制裁。不過許智峰之後又唔守規矩，違規喺只有獲邀人士有權使用嘅「咪兜」位做訪問。今次帶佢入立會搞事嘅單仲偕，隨時又要孭鑊。
卓妮