中環出更：上海總會力撐惜食堂
識食，更要惜食。近年香港興起惜食風，小寶慈善基金創辦人董愛麗（Gigi），因為唔忍心見到年邁老人執紙皮維生，於是成立惜食堂為老人家送上愛心熱飯，三年來漸受社會肯定，「惜食」兩字亦成為潮語。不過惜食堂位於小西灣嘅中央廚房，租約將於今年七月屆滿，上海總會理事長王緒亮收到風，立即號召同鄉斥資千萬元鼎力支持，實行為善不甘後人。
Gigi都係上海人，佢父親董偉係上海總會副理事長。睇住Gigi長大嘅王緒亮話，惜食堂每日提供三千個飯盒畀有需要人士，佢聽聞惜食堂中央廚房租約到期後，立即提議總會出力支持。
斥近二千萬購廚房
理事會早前已一致通過伸出援手，依家正物色近五千幾呎廚房，以總會名義購入後，再以象徵式租金租畀惜食堂，以解決廚房經常被迫搬遷嘅問題，估計涉額近兩千萬元。
王緒亮話，上海總會唔只同鄉聯誼會咁簡單，亦係慈善團體，多年來支持好多慈善活動。今次出手幫助惜食堂，一來可以減少廚餘，二來解決貧困人士溫飽問題，三來可當係總會嘅物業投資，十分划算。
董偉對囡囡咁有慈悲心感到好欣慰，佢憶述三年前Gigi提起要做惜食堂，將超市回收嘅食材製成飯盒，送畀啲唔方便煮餸或落街買飯嘅長者，佢即時高舉雙手贊成。自細衣食無憂嘅Gigi，依家全職行善，兩個囡囡亦跟住佢做義工。講起成立小寶基金緣起，Gigi話，當年家婆去世後留下一筆錢，佢同丈夫商量後決定以奶奶名義做善事，後來就專注做好惜食堂。俗語有話「相由心生」，Gigi心地咁好，難怪愈睇愈靚女。
卓妮