政情：阿Paul買諮詢車 為超選開路？
立法會議員謝偉俊（Paul）自從○八年當選後，都係保持獨立之身，佢近期似乎想硬銷自己嘅法律專業形象，尋日聯同黃大仙區議員李達仁，親自落區擺街站提供法律意見。有幾十個街坊去現場搵佢，大部分都係老人家，唔少都想問問百年歸老後安排，包括立番張平安紙。
落區推動法律普及化
阿Paul話，未來一段時間會定期落區推動法律普及化，遲啲仲諗住買番架可以坐多啲人嘅廿八座van仔，作為流動法律諮詢車喎。政界有傳佢一六年諗住越級挑戰「超級區議員」議席，仲已經物色緊落戶邊個區議會，但佢就話暫時未有打算，先服務本區居民先。佢又話，今次落區都係試下水溫，睇吓將來點喎。
如果阿Paul真係想選超級區議員，依家起步都差唔多喇，到時佢咪可以用架van仔去勻全港十八區，似乎呢招都算係諗過度過喎。