二○一六及一七年政改諮詢正進行得如火如荼，加上六四事件廿五周年臨近、七一佔中又如箭在弦，喺呢個極度敏感同關鍵嘅時刻，仲唔係「搞事四人幫」密謀反中亂港嘅黃金時機？外號「李漢奸」嘅民主黨創黨主席李柱銘及外號「民主阿婆」嘅前政務司司長陳方安生，尋日就約埋「行孖必」啟程出訪美國，記憶中係佢哋首度聯手齊齊向老美求援。兩人叩見完美國佬都未夠喉，之後仲要飛埋去加拿大，實行「唱衰香港」先至安樂。
末代港督彭定康早前訪港五天，密密會見包括民主阿婆在內嘅多名港英餘孽，擺明針對香港政改而來。不過美國佬就冇咁好招呼喇，改為叫班港英餘孽自己飛去美國叩見。尋日有兩份報章不約而同報道，李漢奸同民主阿婆已於尋日一齊飛往美國紐約，出席由美國亞洲協會（Asia Society）喺周一舉辦嘅座談會，就「香港民主的未來」進行對談。兩人之後會轉飛美國首都華盛頓，繼續向當地華僑同傳媒唱衰香港，並聲稱有機會與美國國會議員以至官員會面添。
民主阿婆之後又會應加拿大亞太基金會（Asia Pacific Foundation）邀請，到訪渥太華、多倫多同溫哥華三個最多華人聚居嘅城市，仲叫埋李漢奸一齊去幫口「唱雙簧」，預計兩人玩到四月中先至返港。兩人咁嚮往美加兩國嘅西式民主，不如乾脆留居當地慢慢享受，以後都唔好返香港囉！