收益大減
唐唐當年推出計劃時，曾經以外國為例，話呢啲特色、創意嘅車牌可以為城市帶來新意，仲話每年預計有七千萬元收入，其中六千萬元用作扶貧，可惜咁多年來，最高一年嘅收入只得四千八百多萬元，最低嘅去年只得二千二百萬元添。而每個車牌嘅平均拍賣價，就由○六年嘅三萬八千多元，跌到去年只得一萬零五百九十一元，同政府當年估計每個牌嘅平均價達二萬元至二萬五千元亦差好遠。收入減少，政府惟有年年倒貼幾千萬元去扶貧。
不過，自訂車牌講究創意，令人驚喜嘅車牌自然有人搶，政府資料顯示，愈特別嘅車牌就拍賣得愈高價，好以個多月前一個「MM」嘅車牌，亦以一百五十二萬元刷新咗拍賣價新高，似乎自訂車牌嘅發展趨勢係貴精不貴多。