政情：雙貪遺禍累司局長「受審」
立法會明日起一連五日召開財務委員會特別會議，由多名司局長就年度財政預算輪住接受議員「公審」。今年議員向政府部門提出足足六千八百幾條書面質詢，破晒歷年紀錄。我哋仲觀察到，唔少問題根本衝着「貪曾」前特首曾蔭權爵士同「貪湯」前任廉政專員湯顯明呢對「絕代雙貪」而來。估唔到雙貪執包袱敗走咁耐，依然要連累部門同事連夜趕工幫佢釋除議員疑慮，認真累人累物！
飲咩食咩都睇到實
我哋從政府向財委會特別會議提交嘅文件睇到唔少端倪，好似何秀蘭就要求公務員事務局交出專職負責檔案管理嘅人手編制、獲准保存同銷毁嘅檔案資料，好似檔案數目、係咪屬機密文件等，問得相當巨細無遺，相信就係同貪曾任內特首辦，懷疑銷毀自己任內「貪盡海陸空、歎盡省港澳」連串醜行嘅證據，令外界無法得知佢用公帑買酒同豪華外訪開支記錄有關。
何秀蘭仲向局方要求提交過去三個財政年度嘅酬酢同送禮開支詳情，相關問題連郭家麒同陳家洛都有問及。如果唔係絕代雙貪遺禍，議員又使咩連局長飲咩食咩都睇到實吖，部門同事亦唔使日夜趕工回答呢啲問題啦！所以雙貪至今依然陰魂不散，如果廉政公署再唔採取實際行動，雙貪只會繼續遺禍人間。
慢必關心同性議題
另外，唔少議員都會為佢哋所屬嘅界別發聲，好似公開咗同志身份嘅陳志全（慢必）就相當關心與同志、反性傾向歧視甚至一切同「性」有關嘅議題。慢必提交嘅問題包括查詢「性別認同及性傾向小組」人手編制、淫褻物品審裁處評定淫褻案件數量同物品類別等，似乎係議會內嘅「性事」代言人。
至於一早揚言會再「拉布」嘅梁國雄（長毛）亦唔執輸，向多個部門要求取得該部門首長級公務員人數、薪金、福利同津貼等數據，相信搜集呢啲數據係為「拉布」作準備，儲定彈藥向逐個部門要求減人手、減人工，誓要拉布拉到底。