中環出更：區璟智「高水皮」畫作參展
「頭箍小姐」財經事務及庫務局常任秘書長區璟智今年即將退休，但退休前已經識得忙裏偷閒，師從著名畫家沈平習畫，仲將畫作跟隨沈老師嘅作品參加師生展添！不過，區璟智笑言，重新習畫只係短短兩年，平均一個月先上一次堂，四幅參展畫作只屬「高水皮」作品喎。
「幾時生日就退休」
區璟智向卓妮透露，早喺三十年前已經學習水墨畫，後來工作關係放低咗呢項興趣，直至兩年前經同事介紹下的起心肝重新習畫，仲轉行油畫路線，所以一切都要由頭學起。區璟智嘅畫作中，有喺屋企隨手攞起枱布、生果嘅隨意構圖，亦有趁去年遊法國盧瓦爾河畔（Loire Valley）嗰陣留影，返香港慢慢勾畫番當時美景。呢兩幅都成為佢嘅得意之作。
原本有份主理亞太經濟合作組織（APEC）財長會議嘅區璟智話，即使會議泡湯，都仲有幾個任務要完成先走得，包括引入無紙化證券市場制度及成立獨立保險業監管局（保監局）。至於幾時先正式退休歎世界，佢就大賣關子，笑言會跟足公務員制度，「幾時生日就幾時退休」，「終於有得抖下」相信會係佢最好嘅生日禮物喇。
卓妮