中環出更：烹飪比賽 議員鬥「蝦」碌
立法會議員平時把口就叻，但講到煮食就相信冇乜邊個得嘞！尋日一班議員參加咗扶康會同中電合辦嘅烹飪比賽，同智障隊員合作齊煮蝦碌，點知個個議員變咗鬥「蝦」碌，煮到冒晒煙。有議員自爆十歲已經識得煮嘢食，而部分議員則從來唔入廚房，爭做「杯麵廚神」，認真搞笑。
今次參賽嘅議員包括劉慧卿、陳克勤、陳恒鑌（Ben）、莫乃光等，雖然卿姐同克勤已經唔係首次參賽，但觀乎佢哋嘅表現就似乎冇咩點進步嘞。克勤透露，佢喺屋企淨係識煮杯麵，仲好有心得添，佢話杯麵太「重口味」，故第一轉湯要倒咗去，第二轉先好食喎，佢仲話要做「杯麵廚神」！
爭做「廚神」 卿姐鬧克勤
講到比賽，克勤仲斗膽向卿姐下戰書，話只要唔好煮得衰過卿姐變成「地獄廚神」就得嘞。卿姐聽到之後一笑置之，鬧克勤係「衰仔嚟嘅」，強調自己煮杯麵都係最叻，誓要爭奪「杯麵廚神」呢個稱號。
相反阿Ben煮嘢就有板有眼，比賽期間仲示範拋鑊添！佢自稱十歲已經識煮飯畀全家人食，又經常跟媽咪去街市買餸，所以買慣買熟，唔怪之得上次第一次參加就奪得金獎啦！不過，今次唔知係咪失準，佢煮啲蝦被評判批評冇乜味，莫非佢平時食得好清淡？至於莫乃光就煎燶晒啲蛋，望見啲燶蛋成個人呆咗。
立法會主席曾鈺成亦有現身為參加者打氣，中電企業發展總裁莊偉茵（Quince）就趁機會向佢推介一部踏步發電機，佢貪得意踏咗約一至兩分鐘，就已經儲到足夠一部智能手機通話一小時嘅電量，於是靈機一觸，建議擺一部喺立法會，等啲議員「拉布」時可以發吓電喎。呢個建議幾好吖，等啲議員嘥公帑之餘，可以幫補吓立法會嘅電費嘛。
卓妮