公民黨（公文袋）呢個大狀黨向來以一盤散沙見稱，每個黨員都鍾意各持己見，講得好聽就叫獨立思考，但講得難聽就係冇黨格囉。尋日該黨兩位立法會議員湯家驊（阿湯）同毛孟靜（阿毛）就表演「狗咬狗骨」，喺會議廳內公開「互片」，真係不堪入目。
立法會資訊科技及廣播事務委員會尋日舉行特別會議，阿毛發言時已經亂講嘢，明明通訊事務管理局（通訊局）未開始執法，佢已經批評人哋雙重標準。阿毛狂轟通訊局收「政治柯打」，要進行政治任務打壓港視，講講吓無啦啦又將港視事件拉埋內地維權人士譚作人一齊講。
之後輪到阿毛嘅黨友阿湯發言，正當大家以為阿湯會硬撐阿毛時，佢第一句就話自己「幫理不幫親」，講明唔會同意黨友阿毛嘅言論，因為唔覺得通訊局係執行政治任務喎。
阿毛聽到後即時黑面，點知阿湯仲嫌未夠喉，加多句話自己一定唔支持阿毛提出嘅動議，搞到阿毛個樣黑過包公，現場火藥味濃烈。可能連阿毛都知自己理虧，惟有粒聲唔出走咗去作無聲抗議。唉，其實黨內有唔同意見好正常，但浮晒面畀公眾睇到，咪令人覺得該黨一盤散沙囉！