中西區區議會再爆出鬧劇！繼早前就是否公開會議討論推廣《基本法》撥款一事，最終演變成白鴿黨「乳鴿」許智峰被警方抬離會議室嘅鬧劇。
尋日中西區一個事務委員會重新審批該筆撥款，據聞許智峰今次變招，會議開始後不久就質疑身兼中西區各界協會副主席、委員會主席陳捷貴，喺某個申請項目涉利益衝突，因此無權主持會議。
陳捷貴辯稱，中西區各界協會只係協辦機構，負責宣傳活動，因此撥款同協會無關，更反指工作小組委員會都係活動協辦機構之一，所以如果佢要避席，咁包括許智峰在內好多區議員都要避席埋一份。
許智峰同陳捷貴等人之後繼續各執一詞，期間陳捷貴前後休會同復會三次，最後話許智峰阻礙會議進行，所以勒令佢離開。至於筆撥款點算呢？
據聞陳捷貴要決定係咪考慮按區議會慣列，以書面傳閱方式，喺得到三分之二議員贊成之後通過撥款，講到尾又係鬧劇一場。