商務及經濟發展局局長蘇錦樑（Greg蘇）上任以來頻頻孭鑊，遠嘅唔講，近嘅就有香港電台擬建新大樓撥款申請及香港電視發牌風波，人前嘅Greg蘇都萬箭穿心，被責難對《廣播條例》「唔熟書」，最後索性撒手唔理添，連民建聯黨友都對佢甚有微言。不過，據知Greg蘇喺局內原來有唔少下屬「粉絲」，有人話佢冇「中央集權」係明君，仲好識收買人心添！
有官場中人透露，俗稱AO嘅政務官不時會邀請司局長參加聚會，其中一次就請來Greg蘇撐場。不過，成日畀人話佢唔熟書嘅Greg蘇有備而來，除咗激讚AO同事工作辛勞，仲特別點名大讚自己嘅下屬。上司點名激讚自己，做細嘅勁有面子，頓時生猛番晒。雖然呢番心思好老套，但至少Greg蘇肯做，難怪唔少AO同事咁冧佢。
對於有指Greg蘇忌才，所以遲遲都揀唔啱副局長同政治助理，但有官場中人透露，唔少下屬覺得佢好肯放手畀同事自由發揮，唔會成個管家咁乜都要理。Greg蘇究竟係自知冇料先下放權力吖？定真係咁民主唔行使中央集權呢？真係佢自己先至知喇。