政情：裏應外合佔領立會

議助持通行證 出入無阻

雖然立法會保安都有應付大型示威場面嘅經驗，但正所謂「日防夜防，家賊難防」，唔少泛民議員嘅助理本身就係社運分子，有相當豐富嘅社會運動經驗之餘，最重要就係佢哋個個手持立法會通行證，可以隨時隨地暢通無阻出入立法會大樓，當中請得最多社運分子做議員助理嘅就係社民連梁國雄（長毛）。

長毛幾個助理都係示威常客，例如黃浩銘經常參與大大小小嘅示威活動，出入法庭可謂家常便飯，佢早前更加喺立法會大樓內玩撳而被法庭裁定罪名成立，但最終都只係被判罰款了事。

除咗長毛請咗唔少社運分子外，會計界議員梁繼昌亦都請咗民陣副召集人王浩賢及社運人士周澄做議員助理，如果佢哋到時同示威人士連成一線，攻擊力就可以增強數倍。

進出口界議員黃定光（象哥）擔心，如果有一日有示威者唔去佔領中環而改為佔領立法會，再加上有「內鬼」喺入面接應，立法會將會變成無掩雞籠，到時有幾多保安奮力抗敵都冇用。

建制派籲「撤離」貴重物品

據聞唔少建制派議員仲口耳相傳，話唔好將太多個人同貴重物品擺喺立法會，費事到時臨急臨忙執唔切疏散，被示威者整爛晒喎。

立法會主席曾鈺成尋日出席電台節目時話，台灣學生佔領立法院有好多原因，唔可以單純歸咎於年輕人衝動所致。

佢話香港同內地應該引以為戒，立法會行政管理委員會下月開會都會討論事件，當中一個重要議題係如果立法會被人佔領，仲可以如何運作落去。如果唔盡快制訂應變措施，到時變咗好似台灣行政院副秘書長蕭家淇咁，投訴被示威者食晒佢啲蛋糕同太陽餅就唔好啦！