中環出更：廉署唔執法 貪曾逍遙睇粵劇
上月係「貪曾」前特首曾蔭權爵士被本報踢爆「貪盡海陸空，歎盡省港澳」兩周年，可惜廉政公署調查多時仍未有進一步行動，令貪曾繼續逍遙搵節目。尋日貪曾就聯同太太曾鮑笑薇去演藝學院睇粵劇《再世紅梅記》慈善首演，該劇本有個貪婪霸道嘅貪官角色，貪曾專程去睇呢套粵劇真係啱晒。
肥仔岳接待貪曾夫婦
尋晚七時三十分，貪曾夫婦一抵達演藝學院，就受到旅發局主席林建岳（肥仔岳）同佢朋友嘅招待，仲好似有講有笑，但對於貪曾來講，或者最吸引都係有得貪小便宜，佢途中見到有免費咖啡飲，二話不說就拎起一杯慢慢歎，曾太只可緊隨其後睇住貪曾慢慢飲。不過貪曾飲到咁上下，先回頭同曾太交換個眼神，莫非佢飲完想曾太幫佢拎住隻空杯？
幼子曾慶淳前後腳到
在貪曾夫婦抵達現場後五分鐘左右，經常夜蒲嘅貪曾幼子曾慶淳都靜靜雞到場，周圍搵人傾偈，但呢個地方並唔見有任何「獵物」。卓妮發現，最奇怪係貪曾一家人並冇一齊入場，反而要「前後腳」入場，呢個真係一個不解之謎。不過，慈善首演中場時間，終於見到貪曾同曾慶淳一齊步出到洗手間。
卓妮