中環出更：藥商打假教路防騙
內地遊客不斷湧港購物，令本港藥商及藥房生意出現前所未見咁好景，但時不時就傳出不良商店欺騙消費者嘅案例，影響業界形象。中華製藥總商會早前舉行五十二周年聯歡晚會，本港知名老字號藥商及藥房齊聚，卓妮趁機向班藥界翹楚請教買藥防騙貼士，點知間間老字號講起打假都成肚苦水，大呻自己都係受害者。
身兼香港中成藥商會主席嘅北京同仁堂香港代理泉昌董事副總經理黃楚恒（Stanley）話，賣假藥好冇良心，佢公司長期聘請一位全職員工專責打假，日日到藥房「放蛇」搜證，一有蛛絲馬迹就通知海關。近年中西藥房生意興旺，吸引唔少人入行搵食，難免良莠不齊，所以佢哋選擇藥房合作時都好謹慎。
燈飾誇張店舖須留神
咁有冇貼士畀消費者參考吓？Stanley就話，旺區一啲招牌及燈光裝飾極之搶眼誇張嘅新字號，市民最好小心為上喇！
除咗賣假藥，以錢當両嘅欺騙手法亦屢見不鮮。余仁生董事總經理黃雪英話，市民幫襯老字號就實冇錯，或者買嘢前格吓價、睇清楚標籤，問到清清楚楚先好扑錘。優質旅遊服務協會名譽顧問兼百成堂主席李應生話，中藥零售店一定要攞牌，並承諾遵守營商守則，規管法例早已齊備，當務之急係多啲宣傳推廣，畀消費者知道自身權益。
講番晚宴現場，會長兼嶺南藥廠第三代傳人呂偉強、呂太江翠蓮及三名仔女全家出動。港九藥房總商會理事長劉愛國都有現身，佢話近期奶粉供應穩定咗，業界冇咁忙，藥房生意係佢入行以來最好，但就好難請人嘞。
卓妮