政情：環委會赴歐考察耗公帑「嘥氣」
由環境局局長黃錦星主理嘅「三堆一爐」計劃，年中就會勇闖立法會財務委員會申請撥款，據知闖關難度系數極高，所以佢月初就率領環境事務委員會九名議員，遠赴英國、荷蘭、丹麥及瑞典四國考察當地嘅廢物管理，想話寓歐遊於「箍票」，而議員為咗證明今次出埠唔係浪費公帑，尋日特別喺立法會宴會廳搞咗個展覽。不過，一睇當地又搞等離子氣化、熱能廢物處理，就知呢個考察團都係嘥氣。
花逾36萬 箍票成效存疑
政府擬選址石鼓洲興建焚化爐，但歐洲四國嘅環保措施，簡直係香港環保節能嘅「烏托邦」，其中丹麥一座轉化廢物為能源嘅設施，更融合滑雪道、行山徑、攀石牆同旋轉咖啡室，即使屹立哥本哈根市中心都唔礙眼。
訪問團狂燒至少三十六萬元公帑，但議員回港後，支持嘅繼續支持，團長何秀蘭仍態度曖昧，箍票成效存疑。連工程界盧偉國都話唔使去到歐洲咁遠，近近哋中山已經有類似措施。所以黃錦星今次嘅如意算盤似乎打唔響囉。