中環出更：名人勵志經歷 傳播正能量
近年社會出現唔少紛擾，負能量激增，有組織就發起香港精神大使選舉活動，希望同市民分享更多勵志故事及正能量。活動召集人、新鴻基地產聯席主席郭炳江女婿呂慶耀（Bryant），仲即席分享自己面對逆境時嘅處理方法，發起人全國青聯副主席陳仲尼及香港青聯主席霍啟剛亦有現身宣揚港人嘅拚博精神。
現為呂元祥建築師事務所副主席嘅Bryant話，其實每個人都一定會有經歷低潮嘅時刻，佢十幾年前啱啱讀完大學嗰陣，就曾經收到父母同妹妹喺美國波士頓遇車禍嘅消息，爸爸呂元祥同媽媽仲因傷勢嚴重而要分開喺兩間醫院留醫。當時佢非常迷惘，但冇自怨自艾，反而選擇見步行步，去學煲紅蘿蔔瘦肉湯，日夜頻撲兩間醫院探父母。
不斷前進 扭轉困局
Bryant話，面對困難嘅時候，一定要積極改變現狀，令自己唔好失去方向，佢仲以爬喜馬拉雅山做比喻，強調前進並冇捷徑，無論大霧或好天氣，行嘅方法只有「左腳、右腳、左腳」，只有不斷向前踏步，先會有機會改變。
講到正能量，當然唔少得家人嘅支持同愛護啦，啟剛一講到囝囝近況就非常雀躍，佢話囝囝仲未學識行路，但最近就經常係度跳吓跳吓，可能似媽咪「跳水公主」郭晶晶咁喎，唔知將來會唔會成為運動健將呢？啟剛又話，囝囝已經認得身邊嘅親人，未學講嘢已經成日係度大叫大嗌，似乎將來好啱從政喎。
曾經當選精神大使嘅山度士同楊小芳亦有分享個人經歷。楊小芳九歲時因意外喪失一對手臂，但佢意志力非凡，挑戰體能極限，喺過往傷殘人士田徑運動會中取得多面金牌，尋日仲示範用腳寫字，勇氣可嘉。前香港足球先生山度士就透露，佢接受評審時仲緊張過踢波，驚到幾晚瞓唔着，入到評審房間仲同評審員一齊深呼吸，真係估佢唔到。
卓妮