末代港督肥彭近日訪港，受到遺老遺少夾道歡迎，有人舉港英旗，有人唱天佑女王，有人送上佢最愛嘅蛋撻，有人激動到涕淚交流，有人要求香港回歸英國。唉，簡直係烏煙瘴氣，醜態百出。
堂堂正正中國人唔做，卻鍾意做漢奸，話香港唔係漢奸之城都唔得啦。好似天下無人不識君嘅李漢奸咁，公然自認「日日做漢奸」、「有需要就做漢奸」，做漢奸做到咁坦白，咁高調，咁無恥，點到你唔服。至於「搞事四人幫」嘅其餘三人，淫賤黎、陳老太同埋前主教，都係同一路貨色。呢，肥彭一抵港咋，當晚即刻約人食飯傾密偈，你估係邊個吖嗱？咪就係陳老太囉，一主一僕密室談心訴衷情，被人撞破好事之後，齊齊死撐否認同香港政改、佔中有關，呢啲咪叫此地無銀三百両囉。
回歸十七年，香港亂過亂世佳人，主要原因就係大小漢奸搞搞震。有人睇唔過眼，發起遊行要求港府重新就《基本法》二十三條立法，禁止叛國做漢奸呢類反骨仔行為。可惜吖，二十三條已經污名化，港府又弱勢，經濟民生問題都搞唔掂，目前正為政改頭痛，邊夠膽另起火頭吖。
話時話，二十三條立法遠水難救近火，係咪意味住民族敗類可以逍遙法外，不受制裁呢？梗唔係啦，事在人為嘅啫。抗日戰爭時期，老百姓自發組織鐵血鋤奸團，漢奸賣國賊人人得而誅之，第一漢奸汪精衞亦被刺殺，中咗三槍，雖然執番條命，不過最終都係舊患復發，一命嗚呼。抗戰勝利後，國民政府展開全國大肅奸行動，好似汪偽政府情報頭子丁默邨，即係電影《色，戒》嘅男主角原型，就係嗰陣被槍斃嘅。
就算和平時期，處理奸細一樣有辦法。韓國曾通過《親日反民族行為者財產歸屬特別法》，凡喺日據時期為殖民政府効力者，不義財產一律充公，結果有四百多親日派及其後人財產被處理。他山之石，可以攻玉，如果香港亦設立類似法律，睇吓邊個仲夠膽話日日做漢奸，邊個揸住爵士銜唔捨得放手！
唔係反奸冇辦法，只怕北大人冇魄力。唔係咩？壹淫媒成日鼓吹「天滅中共」，乞求外國干預中國內政，冇受懲罰不特止，反而仲得到獎賞添，中銀幫佢借殼上市，中資企業為佢輸血續命，連紅色根據地井岡山都送上獨家廣告，卒之咪養肥淫賤黎，愈鬧愈爽囉。
都係嗰句喇，愛國不如不愛國，不愛國不如賣國，北大人仲話乜嘢愛國愛港陣營長期執政，其實係漢奸餘孽長期執政就真！