政情：廢鑊欺凌同學 點管平機會？
每逢暑假，本港啲大專院校不時爆出有學生組織搞「淫亂O-Camp（迎新營）」，部分有涉嫌性騷擾同觸犯《性別歧視條例》之嫌。外號「周一鑊」嘅平等機會委員會主席周一嶽尋日出席一項反性騷擾嘅活動時，就預告暑假佢哋會殺入各間大學，教吓班同學仔點樣避免違法。不過佢轉個頭又自爆，自己讀大學時都成日欺凌啲同學甚至學長。周一鑊其身不正，又邊有資格教人呢？
讀U唱難頂「嶽曲」
周一鑊透露，佢入大學頭一個月時成日畀班師兄欺凌，但係去到第二個月開始，佢就不時蝦番班師兄，其中一招係喺啲溫緊書嘅同學面前大展歌喉，而且一唱就唱足個半鐘。早前周一鑊一曲走晒音、甩晒嘴嘅《忘不了你》，短短幾分鐘已聽到大家「嘔白泡」，要人聽「嶽曲」聽足個半鐘，真係唔死得都算好彩！
周一鑊又提到，有人當粗口係一種社交習慣同語言，但其實好多粗口都可能涉及性騷擾同歧視。問佢有冇講過粗口，佢聲稱自己一向好有禮貌，十一歲以後就唔再講粗口喇！十一歲先至唔講？唔通佢幾歲大嗰時已經粗口爛舌？