中西區區議會工作小組月初開會討論涉及廿五萬元推廣《基本法》活動撥款，因是否開放會議等程序問題爭論不休，最後更鬧出警方強行抬走白鴿黨區議員許智峰一事，據聞呢件事已經嚇怕其他區議會嘅民政事務專員（DO），要求每次喺開會時都要跟足程序嚟做。
有建制派區議員透露，沙田區議會近日就舉行《基本法》推廣活動成立工作籌備小組，小組成員以建制派為主，入面一個泛民主派都無，不過有議員擔心如果未經大會通過就貿然定好晒宣傳活動細節，分分鐘會畀班泛民質疑佢哋黑箱作業，所以最近重新擺上大會議程上再作討論。
雖然該區《基本法》活動撥款已無風無浪通關。然而，據聞該區DO仍然未驚完，建議區會唔好好似中西區咁搵區內各組織幫手搞活動，反而建議各委員搞吓小學問答比賽、展板巡迴展覽等安全系數極高嘅活動，希望將出事機會降到最低喎。